25 ноября 2019 г. ·
РАКЪИНИКАЙ МАРФАРИК
Зун вири хьиз са инсан ттир,
Бес вучиз зал ттагъма хьана?
Заз бахтунин хьанач къадир,
Акьул аваз «ахмакь» хьана.
Акъатна зун сакит рекъей,
Алцур хьана, чIалаз фена.
Йа бахт лугьур, йа хва тIекьей,
На зун гьиниз галаз фена?
Гьа зи чIала, зи тарихди,
Йифиз, йукъуз галтадна зун,
Гьа азабриз зун къарих ттийн?
Ни махарал алтадна зун?
Низ герек йа алахъунар,
Ви кхьейбур кIел ттахьайла?
ЧIехи крар гъиле къунар,
Аквадани гел ттахьайла?
Ширин жени на авур кар,
Са лезгидиз ккан ттахьайтIа?
Зи рехи кьил бес жечни тIар,
Зи гафар ваз ван ттахьайтIа?
Чакай гьихьтин касар жеда,
Чаз «кас» лугьур гаф ттахьайла?
Зурба кIвалах кьасар жеда,
Гару ппеш хьиз ам тухайла.
Зи кIвалахра вил акьуна,
Заз ккандайвал хьанач завай.
За куьмек кканз цавар къуна,
Зал атана къванар цавай.
Заз гьикI жезва, чи давейар
Чи чIалан ваъ, зи тахсир хьиз.
За сур чIалай гъий девейар
ЛипI хьанава са йесир хьиз.
Ваз минет хьуй, заз килигна,
ЧIалак рехне кутамир на.
Зи гафарал лаш илигна,
Абур зарул къа твамир на.
Виш гьахъдилай, са нагьахъ кас,
Зи рикIиз тIал гуниз бес йа.
Дуьзд чуьнуьхиз, чIуруд акваз,
Ам тIул чIуру са иблис йа.
Ада ттечиз гьарам-гьалал,
КьацIай гафар гваз къведа ваз.
Ви рахунра гьадан «чIалал»
Жаваб тталгьуз тIал жеда ваз.
Ваз ттечидинд гьакI амукьрай,
Ваз ччидинди ахъайдач на.
Ви ччидинди вав гумукьрай,
Зи ччидинди пайда чна.
Вуч залан йа, ви гъавурда
Акьадин кас ттежен ппатав.
Ваз ви тарих ччир авурди,
Чав авурди, зав гува, зав!
24.11.19
|